الفنان الكبير "يوسف فوزي" فنان تألق فى أوائل الثمانينات من خلال عشرات الأدوار المساعدة فى السينما والتليفزيون!.. من أهم أدواره فى السينما: النمر الأسود، حتى لا يطير الدخان، شاهد إثبات، شبكة الموت، الجاسوسة حكمت فهمي، ظرف طارق.. وكان له تواجد مهم برضه فى التليفزيون من خلال مسلسلات: هوانم جاردن سيتي، القرموطي في مهمة رسمية، أوبرا عايدة، فارس بلا جواد، الملك فاروق، وغيرها..
للأسف من فترة قريبة قرر "يوسف فوزى" يعتزل الفن نهائياً بعد إصابته بمرض الشلل الرعاش لعدم قدرته إنه يقف قدام الكاميرا، وإنه مش بيقدر يسيطر على حركة إيده ولا يركز فى أداء الأدوار بتاعته!.. "يوسف" قال إنه راضي كل الرضا بقضاء ربنا وفضل إنه يبعد عن الحياة التمثيلية تماماً عشان مايكونش سبب فى تعطيل أى عمل أو مضايقة أى مخرج أو منتج بسبب مرضه!..
اللى إكتشف إصابت "يوسف" بالشلل الرعاش كان الفنان "عادل إمام"!.. أثناء تصوير "يوسف" لمشهد مع الزعيم فى مسلسل "أستاذ ورئيس قسم" فى سرادق عزاء لاحظ الزعيم إن إيد "يوسف" بتتحرك برعشة.. فقال له.. فإنتبه "يوسف" اللي ماكنش واخد باله، ولما كشف عرف موضوع المرض!..
الحاجة الغريبة إن خلال أحداث مسلسل "أوبرا عايدة" للنجم "يحيى الفخراني" واللي جسد فيه الفنان "يوسف فوزي" دور الطبيب "جلال عوني" بتصاب الشخصية خلال أحداث المسلسل بالشلل الرعاش!.. وأجاد "يوسف فوزي" جداً فى أداء الدور وهو ده اللي حصل معاه بعدها فى الواقع!..
تعليقات
إرسال تعليق